Andri Lucas Guðjohnsen gæti verið á förum frá belgíska liðinu KAA Gent áður en félagaskiptaglugginn lokar, en bæði hollenska úrvalsdeildarliðið FC Utrecht og enska B-deildarliðið Preston North End hafa áhuga á að fá hann í sínar raðir.
Belgíski blaðamaðurinn Sacha Tavolieri greinir frá því að Gent hafi gefið grænt ljós fyrir mögulegum félagaskiptum og að bæði Utrecht og Preston eigi í viðræðum við Andra.
Utrecht er talið standa sterkar að vígi í samkeppninni, þar sem liðið heldur í vonina um sæti í Evrópudeildinni eftir að hafa komist í umspil um sæti í keppninni í kvöld. Kolbeinn Birgir Finnsson leikur með liðinu.
Andri Lucas gekk til liðs við Gent frá Lyngby í Danmörku á síðasta ári fyrir tæpar þrjár milljónir evra. Hann hefur spilað 48 leiki fyrir belgíska liðið, skorað fimm mörk og lagt upp tvö.
