Tómas Bent Magnússon var á ný í byrjunarliði Hearts í skosku úrvalsdeildinni í dag þegar liðið mætti Aberdeen á útivelli. Þetta var annar leikurinn í röð sem Tómas er í byrjunarliðinu og lék í þetta skiptið í 86 mínútur, en Hearts mátti þola sitt fyrsta deildartap á tímabilinu og laut í lægra haldi, 1:0.
Kjartan Már Kjartansson sat allan tímann á varamannabekk Aberdeen og bíður enn eftir að fá tækifæri í liði sem hefur verið að sækja í sig veðrið að undanförnu.
Þrátt fyrir tapið situr Hearts áfram á toppi deildarinnar með 30 stig eftir þrettán umferðir, fjórum stigum á undan Celtic sem á leik til góða. Aberdeen er í 8. sæti með 14 stig.
Danijel Dejan Djuric fékk tækifæri í byrjunarliði IK Istra í 1:0 tapi gegn HNK Gorica í króatísku úrvalsdeildinni. Danijel lék í 78 mínútur í leiknum en hann hefur fengið fá tækifæri að undanförnu. IK Istra er í 5. sæti af 10 liðum með 19 stig eftir fjórtán umferðir.
Gísli Gottskálk Þórðarson kom inn af bekknum á 84. mínútu í góðum 4:1 sigri Lech Poznan á Radomiak Radom í pólsku úrvalsdeildinni. Með sigrinum fór Lech Poznan upp í 4. sætið og í 24 stig eftir fimmtán umferðir.
Brynjólfur Darri Willumsson kom inn á sem varamaður hjá Groningen á 65. mínútu í 2:2 jafntefli við PEC Zwolle í hollensku úrvalsdeildinni. Groningen er í 7. sæti með 20 stig eftir þrettán umferðir.
Þá lék Óttar Magnús Karlsson í 69 mínútur fyrir Renate í 1:0 sigri liðsins gegn Novara í ítölsku C-deildinni. Renate er í 9. sæti með 20 stig eftir fimmtán umferðir.
