Tómas Bent Magnússon var áberandi í skoskum dagblöðum í gær og fyrradag eftir að hafa skorað sitt fyrsta mark fyrir Hearts í skosku úrvalsdeildinni um nýliðna helgi.
Stórar myndir af Tómasi, þar sem hann fagnaði marki sínu af mikilli innlifun, birtust í dagblöðunum Daily Record, Evening Telegraph, Edinburgh News og The Sunday Post í umfjöllun þeirra um stórsigur Hearts á Dundee.
Tómas kom inn á sem varamaður á 71. mínútu og skoraði níu mínútum síðar fjórða mark Hearts í 4:0-sigri liðsins. Hann var á réttum stað í teignum eftir hornspyrnu og skoraði af stuttu færi.
Markið var það fyrsta sem Tómas skorar fyrir Hearts og var hann greinilega ánægður með áfangann, eins og sjá má á myndunum sem prýddu dagblöðin. Hearts er taplaust á toppi skosku úrvalsdeildarinnar með 29 stig eftir 11 umferðir, níu stigum á undan Celtic.
