Ragnheiður Þórunn Jónsdóttir, 17 ára leikmaður Vals, hefur gengið til liðs við PEC Zwolle í hollensku úrvalsdeildinni að láni út þetta tímabil.
Ragnheiður hefur verið áberandi hjá Val á leiktíðinni, þar sem hún skoraði fimm mörk í Bestu deildinni og eitt í bikarkeppninni. Hún er uppalin hjá Haukum og samdi við Val fyrir síðasta tímabil en framlengdi nýlega samning sinn við liðið til ársins 2027. Alls hefur hún skorað níu mörk í 37 leikjum í Bestu deildinni.
„Mitt fyrsta ævintýri utan Íslands er afar sérstakt,“ sagði Ragnheiður í viðtali við heimasíðu Zwolle. „Ég hlakka til að þróast áfram í sterku umhverfi og tel Zwolle vera góðan stað til að taka næstu skref.“
PEC Zwolle hefur þrjú stig eftir fyrstu tvo leiki tímabilsins en endaði í 10. sæti í fyrra. Liðið mætir meisturunum í Twente á sunnudag.
