Kristian Nökkvi Hlynsson skoraði eina mark Twente í 1:1-jafntefli á útivelli gegn Groningen í hollensku úrvalsdeildinni í dag.
Kristian kom Twente yfir á 47. mínútu með skoti af stuttu færi, en heimamenn jöfnuðu skömmu síðar og þar við sat. Brynjólfur Darri Willumsson kom inn á sem varamaður á 71. mínútu hjá Groningen.
Kristian hefur verið í góðu formi undanfarið og skoraði einnig í síðasta leik. Hann er nú kominn með þrjú mörk og tvær stoðsendingar í ellefu deildarleikjum á tímabilinu.
Twente er í 8. sæti deildarinnar með 15 stig eftir ellefu umferðir, en Groningen er í 5. sæti með 19 stig.
Þá kom Nökkvi Þeyr Þórisson inn á sem varamaður á 84. mínútu hjá Sparta Rotterdam í 1:0 tapi gegn AZ Alkmaar. Sparta Rotterdam er í 7. sæti með 16 stig.
