Kristian Hlynsson var í byrjunarliði Twente þegar liðið tapaði 2:0 fyrir PSV í hollensku úrvalsdeildinni í dag.
Kristian lék fyrir aftan fremsta mann Twente og var tekinn af velli á 71. mínútu leiksins. Twente er án stiga eftir fyrstu tvær umferðirnar.
Nökkvi Þeyr Þórisson kom við sögu í blálokin hjá Sparta Rotterdam í 2:1 sigri liðsins gegn Utrecht. Kolbeinn Finnsson var ónotaður varamaður hjá Utrecht. Sparta Rotterdam og Utrecht eru bæði með þrjú stig.
Guðmundur Þórarinsson lék allan leikinn fyrir Noah þegar liðið vann Ganzasar, 4:1, í úrvalsdeildinni í Armeníu. Noah hefur unnið fyrstu tvo deildarleiki sína á nýju tímabili.
Í B-deildinni í Póllandi var Oliver Stefánsson í byrjunarliði GKS Tychy sem gerði 2:2 jafntefli við Leczna. Oliver lagði upp fyrra mark GKS Tychy snemma í fyrri hálfleik en fékk síðan rautt spjald seint í seinni hálfleik. GKS Tychy er í 8. sæti með 8 stig eftir fimm umferðir.
