Kristall Máni Ingason kom liðu sínu Sønderjyske á lagið í 2:0-útisigri liðsins á Silkeborg í 7. umferð dönsku úrvalsdeildarinnar í dag.
Kristall Máni var í byrjunarliði Sønderjyske, lék allan leikinn og skoraði fyrra mark Sønderjyske snemma í seinni hálfleik með skalla úr miðjum teignum en Daníel Leó Grétarsson kom við sögu í undirbúningnum með fyrirgjöf inn á teig. Daníel Leó fór af velli á 71. mínútu.
Kristall Máni skoraði einnig fyrir Sønderjyske í þarsíðustu umferð gegn Fredericia. Sønderjyske er í 5. sæti deildarinnar með 10 stig.
Mikael hafði betur í Íslendingaslag
Norrköping tók á móti Djurgården í Íslendingaslag í sænsku úrvalsdeildinni. Arnór Ingvi Traustason og Ísak Andri Sigurgeirsson voru í byrjunarliði Norrköping sem þurfti að sætta sig við stórt tap, 4:0. Arnór Ingvi var tekinn af velli eftir fyrri hálfleikinn og Ísak Andri lék í 89. mínútu en Mikael Neville Anderson lék fyrstu 69 mínúturnar fyrir Djurgården.
Djurgården er í 8. sæti með 34 stig á meðan Norrköping er í 11. sæti með 25 stig eftir 22 umferðir.
Daníel Tristan Guðjohnsen lék allan tímann í fremstu víglínu Malmö sem gerði 1:1 jafntefli við botnbaráttuliðið Degerfors. Arnór Sigurðsson kom inn á hjá Malmö á 84. mínútu. Þarna fóru tvö dýrmæt stig í súginn hjá Malmö sem er í 4. sæti með 38 stig og í harðri baráttu um Evrópusæti.
Guðmundur Þórarinsson lék fyrsta klukkutímann í 2:0 tapi Noah gegn Alashkert í úrvalsdeildinni í Armeníu. Þetta var fyrsta tap Noah eftir fyrstu þrjá leikina í deildinni.
Elías Már Ómarsson náði ekki að skora fyrir lið sitt Meizhou Hakka sem tapaði 2:0 fyrir Shenzhen Peng City í botnbaráttuslag í kínversku úrvalsdeildinni. Meizhou Hakka er í 14. sæti af 16 liðum þegar sjö umferðir eru eftir.
Nökkvi Þeyr Þórisson kom inn á sem varamaður undir lokin þegar Sparta Rotterdam steinlá gegn Feyenoord, 4:0, í nágrannaslag í hollensku úrvalsdeildinni. Sparta Rotterdam hefur unnið tvo af fjórum fyrstu leikjum sínum.
Þá lék Brynjar Ingi Bjarnason allan leikinn fyrir Greuther Fürth í miklum markaleik í þýsku B-deildinni gegn Magdeburg, 5:4. Greuther Fürth skoraði dramatískt sigurmark á níundu mínútu uppbótartímans og var þetta annar sigur liðsins eftir fjórar umferðir.
