Katla Tryggvadóttir hefur skrifað undir samning við Fiorentina á Ítalíu og var hún kynnt til leiks í morgun.
Katla er aðeins tvítug að aldri en hefur þegar látið til sín taka. Hún gekk til liðs við Kristianstad í Svíþjóð árið 2023 eftir að hafa vakið athygli með Þrótti Reykjavík í Bestu deildinni, þar sem hún skoraði 13 mörk í 39 leikjum. Ferilinn hóf hún upphaflega með Val.
Í síðasta mánuði lék Katla sinn fyrsta leik á stórmóti með íslenska A-landsliðinu þegar liðið tók þátt í Evrópumótinu í Sviss. Hún hefur alls spilað níu A-landsleiki og á auk þess að baki 29 leiki og 11 mörk með yngri landsliðum Íslands.
Fiorentina endaði í fjórða sæti ítölsku A-deildarinnar á síðasta tímabili og er eitt af bestu liðum deildarinnar. Alexandra Jóhannsdóttir, sem nú leikur með Kristianstad, var áður á mála hjá Fiorentina. Íslensku landsliðskonurnar Karólína Lea Vilhjálmsdóttir og Cecilía Rán Rúnarsdóttir leika síðan með Inter á Ítalíu.
