Jón Dagur Þorsteinsson skoraði sitt fyrsta mark fyrir Herthu Berlín þegar liðið vann öruggan 3:0-sigur á Elversberg í 32-liða úrslitum þýsku bikarkeppninnar í gærkvöldi.
Jón Dagur, sem hefur ekki átt fast sæti í byrjunarliðinu á leiktíðinni, byrjaði á varamannabekknum en kom inn á þegar um fimm mínútur voru eftir af venjulegum leiktíma. Hann tryggði síðan endanlega sigurinn með marki úr vítaspyrnu í uppbótartíma, eftir að hafa sjálfur verið felldur innan teigs.
Markið var það fyrsta sem Jón Dagur skorar fyrir Herthu Berlín og jafnframt hans fyrsta á leiktíðinni. Hægt er að sjá markið hérna. Með sigrinum tryggði liðið sér sæti í 16-liða úrslitum bikarsins.
