Lille fór með 1:0 sigur af hólmi gegn Le Havre í frönsku úrvalsdeildinni í kvöld og átti Hákon Arnar Haraldsson sinn þátt í sigrinum. Hann sat á varamannabekknum hjá Lille framan af en var skipt inn á 73. mínútu og lét til sín taka á lokakaflanum.
Á 88. mínútu lagði Hákon boltann til vinstri á Ethan Mbappé sem sendi fyrir markið þar sem Igamane skoraði af stuttu færi og reyndist það sigurmark leiksins. Markið má sjá hérna.
Með sigrinum heldur Lille 4. sætinu í deildinni og hefur nú 26 stig eftir 14 umferðir.
Albert Guðmundsson kom inn á sem varamaður á 64. mínútu í 2:0 tapi Fiorentina gegn Atalanta í ítölsku A-deildinni. Fiorentina er í 19. sæti með aðeins sex stig eftir 13 umferðir.
Hörður Björgvin Magnússon lék allan tímann fyrir Levadiakos í 2:3 tapi gegn PAOK í grísku úrvalsdeildinni. Levadiakos er í 4. sæti með 21 stig eftir 12 umferðir.
Þá lék Kristian Nökkvi Hlynsson í 87 mínútur í 1:0 sigri Twente á AZ Alkmaar í hollensku úrvalsdeildinni. Twente er í 8. sæti með 20 stig eftir 14 umferðir.
