Hafrún Rakel Halldórsdóttir skoraði þriðja og síðasta mark Brøndby í 3:0-útisigri liðsins á OB í dönsku úrvalsdeildinni í dag.
Hafrún byrjaði á varamannabekknum en kom við sögu á 82. mínútu og var fljót að láta til sín taka, því hún skoraði á þriðju mínútu uppbótartímans og innsiglaði þar með sigur Brøndby.
Brøndby er í þriðja sæti deildarinnar með 19 stig eftir ellefu umferðir.
Melkorka Kristín Jónsdóttir skoraði tvö mörk með stuttu millibili þegar B93 tapaði 3:2 fyrir Næstved í dönsku B-deildinni. Næstved tryggði sér sigurinn með marki í blálokin. B93 er í næstneðsta sæti deildarinnar.
Arna Eiríksdóttir var í byrjunarliði Vålerenga sem vann 2:0 sigur á Lillestrøm í norsku úrvalsdeildinni. Vålerenga er í öðru sæti eftir 25 umferðir.
Hlín Eiríksdóttir lék seinni hálfleikinn í 4:1 tapi Leicester gegn Arsenal í ensku úrvalsdeildinni. Leicester er í 10. sæti eftir sjö umferðir.
Þá var Cecilía Rán Rúnarsdóttir í marki Inter í 3:0 tapi gegn Roma í ítölsku A-deildinni. Karólína Lea Vilhjálmsdóttir kom inn á hjá Inter eftir klukkutíma leik. Inter er í 6. sæti eftir fjórar umferðir.
