Borussia Dortmund hafði betur gegn Köln í þýsku úrvalsdeildinni í kvöld, 1:0, eftir að hafa verið mun sterkari aðilinn frá upphafi til enda. Ísak Bergmann Jóhannesson var í byrjunarliði Köln og lék í 72 mínútur.
Sigurmarkið kom þó í uppbótartíma þegar Maximilian Beier fylgdi eftir frákasti í teignum eftir hornspyrnu og tryggði Dortmund sigurinn. Köln er í áttunda sæti með 11 stig eftir átta umferðir.
Í þýsku B-deildinni vann Hertha Berlin 1:0-sigur á Fortuna Düsseldorf. Jón Dagur Þorsteinsson kom inn á eftir klukkutíma leik og átti þátt í sigurmarkinu undir lok leiksins, þegar hann hóf skyndisókn með sendingu fram völlinn sem endaði með því að samherji hans skoraði glæsilegt mark.
Hertha hefur með sigrinum unnið sig upp í áttunda sæti deildarinnar með 14 stig eftir tíu umferðir. Valgeir Lunddal Friðriksson lék ekki með Düsseldorf vegna meiðsla, en liðið hans er í 13. sæti með 10 stig.
