Glódís Perla Viggósdóttir sneri aftur til keppni í dag eftir meiðsli og lék allan leikinn í vörn Bayern München sem gerði markalaust jafntefli við Jena í þýsku úrvalsdeildinni.
Glódís hafði setið hjá í upphafi leiktíðar vegna hnémeiðsla en kom beint í byrjunarliðið að þessu sinni. Hún stóð traust í vörninni og tryggði að heimakonur héldu hreinu, en sóknarlínan átti í erfiðleikum með að nýta fjölmörg færi sem liðið skapaði.
Með þessum úrslitum er Bayern í öðru sæti deildarinnar með sjö stig, jafnmörg og topplið Freiburg sem er með betri markatölu.
Í Svíþjóð tóku Guðný Árnadóttir og Elísa Lana Sigurjónsdóttir þátt í 2:1-sigri Kristianstad á Brommapojkarna. Guðný kom inn af bekknum þegar um hálftími var eftir og Elísa Lana undir lok leiksins. Kristianstad situr í fimmta sæti sænsku úrvalsdeildarinnar með 33 stig. Eyrún Embla Hjartardóttir lék allan leikinn fyrir varalið Häcken í 4:0 tapi gegn Trelleborg í sænsku B-deildinni.
Bergrós Ásgeirsdóttir lék allan tímann fyrir Aarau í 2:0 tapi gegn Young Boys í svissnesku úrvalsdeildinni.
