Emelía Óskarsdóttir átti frábæran leik þegar hún skoraði þrennu í 6:0-sigri Køge á FC Kaupmannahöfn í dönsku bikarkeppninni í kvöld.
Hún byrjaði leikinn á varamannabekknum en kom inn á í upphafi seinni hálfleiks og setti strax svip sinn á leikinn. Emelía skoraði sitt fyrsta mark á 54. mínútu, bætti við öðru á 74. mínútu og fullkomnaði svo þrennuna á 80. mínútu.
Frammistaða Emelíu var til marks um að hún sé aftur komin í sitt besta form eftir erfið meiðsli. Með sigurinum tryggði Køge sér öruggt sæti í næstu umferð keppninnar.
Fanney Inga Birkisdóttir stóð vaktina í marki Häcken þegar liðið vann sannfærandi 10:0-sigur á Rosso Uddevalla í sænsku bikarkeppninni.
Fanney hefur fengið takmörkuð tækifæri á tímabilinu en fékk nú traustið og hélt markinu hreinu í leik þar sem yfirburðir Häcken voru algjörir frá upphafi til enda.
Þá kom Svanhildur Ylfa Dagbjartsdóttir inn á sem varamaður á 82. mínútu þegar lið hennar Elfsborg steinlá gegn Vaxjö, 4:0. Bryndís Arna Níelsdóttir var ekki í leikmannahópi Vaxjö.
