Eggert Aron Guðmundsson, leikmaður Brann, var valinn í lið umferðarinnar í norsku úrvalsdeildinni hjá fréttastofunni NTB eftir glæsilega frammistöðu í 4:1-sigri á Haugesund um nýliðna helgi.
Eggert Aron lék allan leikinn á miðjunni og skoraði tvö af fjórum mörkum Brann, það fyrra snemma í seinni hálfleik með föstu skoti innan teigs og það seinna á 71. mínútu eftir vel útfærða sókn. Hann fékk 8 í einkunn fyrir frammistöðu sína, sömu einkunn og Bård Finne, sem skoraði einnig tvö mörk fyrir Brann í leiknum.
Brann, sem Freyr Alexandersson stýrir, situr nú í þriðja sæti deildarinnar með 49 stig, sjö stigum á eftir toppliði Bodø/Glimt þegar fimm umferðir eru eftir. Sævar Atli Magnússon er frá vegna meiðsla og leikur ekki meira á leiktíðinni.
