Daníel Freyr Kristjánsson hefur skrifað undir nýjan fimm ára samning við danska úrvalsdeildarliðið Midtjylland.
Samningurinn gildir til sumarsins 2030. Daníel hefur verið á mála hjá danska stórliðinu undanfarin ár og vakti mikla athygli á síðasta tímabili þegar hann lék með FC Fredericia á lánssamningi.
Daníel Freyr, sem er 19 ára, var fastamaður í byrjunarliði Fredericia og tók þátt í 33 leikjum þegar liðið tryggði sér sæti í dönsku úrvalsdeildinni á síðustu leiktíð. Hann mun leika á lánssamningi með Fredericia áfram á þessari leiktíð, en einni umferð er lokið í dönsku úrvalsdeildinni.
Midtjylland lýsir mikilli ánægju með framlenginguna og segir Daníel vera dæmi um leikmann sem hefur tekið stórt skref í átt að atvinnumennsku.
Daníel Freyr hefur leikið 35 leiki fyrir yngri landslið Íslands og hefur verið fastamaður í U21 ára landsliði Íslands.
