Brann, sem leikur undir stjórn Freys Alexanderssonar, vann góðan 3:0-útisigur á Sandefjord í norsku úrvalsdeildinni í dag.
Sævar Atli Magnússon var í byrjunarliði Brann og Stefán Ingi Sigurðarson var í byrjunarliði Sandefjord. Þeir voru báðir teknir af velli þegar um 70 mínútur voru liðnar af leiknum. Eggert Aron Guðmundsson var allan tímann á varamannabekknum hjá Brann.
Brann er áfram í þriðja sæti deildarinnar og nú með 43 stig eftir 21 umferð. Næsti leikur liðsins er næsta fimmtudag gegn Lille í deildarkeppni Evrópudeildarinnar.
Davíð Snær Jóhannsson og Ólafur Guðmundsson komu báðir inn á sem varamenn í seinni hálfleik þegar lið þeirra Álasund hrósaði 3:0 sigri gegn Skeid í norsku B-deildinni. Álasund er í þriðja sæti og í harðri baráttu um að komast upp um deild.
Daníel Tristan Guðjohnsen var í byrjunarliði Malmö og lék fyrstu 86 mínúturnar í 1:0 tapi gegn Djurgården. Mikael Neville tók út leikbann hjá Djurgården. Malmö er í 6. sæti með 39 stig eftir 24 umferðir en Djurgården einu sæti neðar með 38 stig.
Þá var Júlíus Magnússon í fremstu víglínu Elfsborg sem laut í lægra haldi fyrir GAIS, 2:0. Júlíus var tekinn af velli á 68. mínútu en Ari Sigurpálsson kom inn á eftir rúmlega klukkutíma leik. Elfsborg er í 8. sæti með 37 stig.
