Guðlaugur Victor Pálsson var áberandi í vörn AC Horsens þegar liðið vann Esbjerg í dönsku B-deildinni í dag.
Íslenski landsliðsmaðurinn var að leika sinn annan deildarleik fyrir Horsens eftir komuna frá Plymouth og stjórnaði varnarleiknum af öryggi. Hann fékk 8,2 í einkunn hjá FotMob og var þar með besti leikmaður vallarins.
„Íslenskur klettur bjargaði AC Horsens,“ skrifaði Horsens Folkeblad í umfjöllun sinni og lýsti Guðlaugi Victori sem afar öruggum varnarmanni.
Horsens er nú aftur komið á toppinn með 18 stig eftir tíu umferðir. Breki Baldursson var ónotaður varamaður hjá Esbjerg, sem er í 6. sæti með 15 stig.
