Jóhann Berg Guðmundsson lék í dag sinn fyrsta deildarleik með Al-Dhafra í Sameinuðu arabísku furstadæmunum. Hann kom inn á í seinni hálfleik þegar liðið vann 2:1-heimasigur á Dibba Al Fujairah.
Jóhann, sem gekk til liðs við Al-Dhafra frá Al Orubah í Sádi-Arabíu í sumar, hóf leikinn á varamannabekknum en var skipt inn á eftir klukkutíma leik. Staðan var þá 1:1 en heimamenn tryggðu sér sigurinn með marki á 74. mínútu.
Þetta var fyrsti deildarleikur Jóhanns fyrir Al-Dhafra en í síðustu viku lék hann sinn fyrsta leik fyrir liðið þegar hann kom inn á í bikartapi gegn Al Wasl. Þar var hann að stíga sín fyrstu skref eftir að hafa jafnað sig á meiðslum á fæti.
Al-Dhafra hefur byrjað tímabilið vel og er komið með tvo sigra eftir þrjár umferðir.
