Guðlaugur Victor Pálsson var í gær kynntur sem nýr leikmaður danska liðsins AC Horsens. Þar mun hann bera treyju númer 26 og er samningurinn til ársins 2027.
Guðlaugur Victor rifti á dögunum samningi sínum við Plymouth Argyle á Englandi eftir rúmt ár hjá liðinu. Hann lék alls 31 leik fyrir Plymouth og bar fyrirliðaband liðsins í byrjun leiktíðar, en sagðist í kveðjuorðum sínum þakklátur fyrir tímann og reynsluna sem hann fékk þar.
AC Horsens, sem leiðir í dag dönsku B-deildina og stefnir á sæti í úrvalsdeild á næsta tímabili, greindi frá komu Guðlaugs Victors á samfélagsmiðlum sínum og lýsti yfir mikilli ánægju með að fá hann í gulu treyjuna.
Guðlaugur Victor er á meðal þeirra sem Arnar Gunnlaugsson, landsliðsþjálfari Íslands, valdi í gær í hópinn fyrir leiki gegn Aserbaídsjan og Frakklandi í undankeppni HM 2026.
View this post on Instagram
