Lech Poznań, eitt af stærstu félögum Póllands, hefur áhuga á að fá framherjann Andra Lucas Guðjohnsen til liðs við sig. Frá þessu er greint á vefmiðlinum Meczyki.pl í dag en liðið leitar nú leiða til að styrkja sóknarleik sinn fyrir komandi átök í pólsku úrvalsdeildinni.
Andri, sem er 23 ára, hefur verið hjá belgíska liðinu Gent í eitt ár og komið við sögu í fjölda leikja í efstu deild í Belgíu. Hann byrjaði hins vegar nýtt tímabil á bekknum í fyrsta leik tímabilisins í síðustu viku.
Gent hefur styrkt sóknarlínu sína í sumar, sem gæti haft áhrif á hlutverk Andra innan liðsins. Það gæti opnað á félagaskipti til Lech Poznań þar sem hann myndi berjast um byrjunarliðssæti, meðal annars við Mikael Ishak, aðalsóknarmann liðsins. Gísli Gottskálk Þórðarson leikur með Lech Poznań en hann gekk í raðir liðsins í byrjun þessa árs.
Samningur Andra við Gent gildir til sumarsins 2028.
