Breska blaðið The Guardian hefur tekið saman lista yfir 60 bestu knattspyrnumenn sem fæddir eru árið 2002. Listinn er unninn í samvinnu við blaðamenn um allan heim, en Fótbolti.net vakti athygli á þessu í dag.
Hinn ungi og efnilegi Andri Lucas Guðjohnsen, leikmaður unglingaliðs Real Madrid, er á listanum. Í umsögn The Guardian um Andra segir að hann sé mjög sterkur líkamlega og öflugur í loftinu. Þá er talað um að hann sé líka fljótur, teknískur og klókur í að afgreiða marktækifærin með báðum fótum.
Andri Lucas gekk í raðir Real Madrid á síðasta ári, en hann hafði áður leikið með unglingaliðum Barcelona og Espanyol.
„Ef hann heldur áfram sömu framförum þá verður Real í skýjunum með að hafa stolið svona hæfileikum af erkifjendum sínum,“ segir að lokum í umsögn The Guardian um Andra.
