Íslensku atvinnu- og landsliðsmennirnir Alfreð Finnbogason og Gylfi Þór Sigurðsson heimsóttu í dag endurhæfingardeild Landspítalans á Grensási. Með þeim í för var Friðrik Ellert Jónsson, sem er sjúkraþjálfari íslenska landsliðsins.
Á endurhæfingardeild Landspítalans er sinnt fjölbreyttum hópi sjúklinga sem eiga það sameiginlegt að hafa tapað færni, tímabundið eða varanlega vegna slysa eða veikinda. Alfreð og Gylfi hittu m.a. Aron Sigurvinsson sem lenti í alvarlegu bílslysi fyrir tveimur mánuðum.
Aron var tíu daga á gjörgæslu eftir bílslysið, en hefur náð góðum bata og á möguleika á að útskrifast af Grensásdeild á næstunni.
Aron spilaði með Elliða árið 2017 og þar áður með 2. flokki Fylkis. Í fyrra spilaði hann með Fjarðabyggð og Huginn í 2. deildinni. Í byrjun sumars spilaði hann einn leik með Hetti/Huginn í 3. deildinni.
