Albert Guðmundsson er á ný orðaður við AS Roma, samkvæmt ítölsku blöðunum La Gazzetta dello Sport og Il Messaggero í dag. Þar segir að Rómverjar séu að skoða möguleika á að styrkja sóknarlínuna þegar félagaskiptaglugginn opnar í janúar.
Í umfjöllun miðlanna kemur fram að staða Alberts hjá Fiorentina sé óljós, ekki síst í ljósi stöðu liðsins í ítölsku A-deildinni. Roma hafði einnig augastað á honum síðasta sumar og er hann áfram talinn áhugaverður kostur, þar sem hann getur leikið í fleiri en einni stöðu framarlega á vellinum.
Joshua Zirkzee, leikmaður Manchester United, er sagður efstur á óskalista Roma, en Albert er jafnframt nefndur sem raunhæfur kostur. Fram kemur að Rómverjar séu líklegir til þess að reyna að fá hann á láni í næsta mánuði.
Roma situr sem stendur í 4. sæti ítölsku A-deildarinnar og leikur í Evrópudeildinni, á meðan Fiorentina er á botni deildarinnar og leikur í Sambandsdeildinni.
