Fjölmargir íslenskir atvinnumenn stóðu sig vel á síðustu dögum og gerðu tilkall í landsliðshópinn sem kynntur verður síðar í dag. Arnar Gunnlaugsson, landsliðsþjálfari Íslands, opinberar þá hópinn fyrir komandi leiki í undankeppni HM upp úr klukkan 13.
Albert Guðmundsson sýndi góð tilþrif í liði Fiorentina í vikunni. Hann skoraði og lagði upp í sannfærandi sigri á Polissya Zhytomyr í umspili Sambandsdeildarinnar og átti síðan stoðsendingu í jafntefli við Cagliari í ítölsku A-deildinni um síðustu helgi.
Daníel Leó Grétarsson var á meðal bestu manna í dönsku úrvalsdeildinni þegar Sønderjyske lagði Brøndby að velli, 2:0. Hann skoraði með góðu skoti og var kjörinn maður leiksins eftir trausta frammistöðu í vörninni.
Brynjólfur Darri Willumsson skoraði fyrir Groningen gegn PSV og sýndi að hann er orðinn mikilvægur sóknarmaður hjá liðinu. Kristian Hlynsson var jafnframt sterkur á miðjunni hjá Twente sem vann Heerenveen.
Valgeir Lunddal Friðriksson átti stoðsendingu í sigri Fortuna Düsseldorf í þýsku B-deildinni, á meðan Ísak Bergmann Jóhannesson lék sínar fyrstu mínútur í þýsku úrvalsdeildinni með Köln sem sigraði Mainz.
Júlíus Magnússon vakti athygli í Svíþjóð. Hann skoraði í bikarkeppninni og bætti við marki í úrvalsdeildinni þar sem hann átti laglegt skot í leik gegn Halmstads. Þá lagði Ísak Andri Sigurgeirsson upp sigurmark Norrköping í leik gegn Östers og María Catharína Ólafsdóttir Gros skoraði fyrsta mark Linköping í 3:0 sigri í úrvalsdeildinni.
Á Ítalíu skoraði Bjarki Steinn Bjarkason mark fyrir Venezia í ítölsku B-deildinni og Óttar Magnús Karlsson var á skotskónum fyrir Renate í C-deildinni í öðrum leiknum í röð.
Orri Steinn Óskarsson tryggði Real Sociedad stig í spænsku úrvalsdeildinni þegar hann jafnaði metin gegn Espanyol. Þá skoraði Logi Tómasson með skalla í leik með Samsunspor gegn Panathinaikos í umspili Sambandsdeildarinnar.
🇦🇲 Armenía
21. ágúst, fimmtudagur:
Guðmundur Þórarinsson kom inn á í blálokin í 4:1 sigri gegn Olimpija Ljubljana í fyrri viðureign liðanna um laust sæti í Sambandsdeildinni.
🇺🇸 Bandaríkin
22. ágúst, föstudagur:
Sveindís Jane Jónsdóttir (Angel City) var í byrjunarliðinu og lék fyrstu 73 mínúturnar þegar lið hennar sigraði Orlando Pride 1:0 á heimavelli í NWSL-deildinni.
24. ágúst, sunnudagur:
Dagur Dan Þórhallsson (Orlando City) lék í 74. mínútur í 5:1-stórtapi gegn Nashville í MLS-deildinni.
🇩🇰 Danmörk
19. ágúst, þriðjudagur:
Ísak Snær Þorvaldsson (Lyngby) fékk tækifæri með Lyngby þegar hann kom inn á sem varamaður á 56. mínútu í tapi liðsins, 2:1, gegn Hillerød í dönsku B-deildinni.
Nóel Atli Arnórsson (AaB) fékk nokkrar mínútur þegar hann kom inn á sem varamaður á 85. mínútu í 1:0 tapi gegn Esbjerg í dönsku B-deildinni.
20. ágúst, miðvikudagur:
Jóhannes Kristinn Bjarnason (Kolding) kom inn á sem varamaður á 69. mínútu í 2:2 jafntefli gegn Aarhus Fremad í dönsku B-deildinni.
Adam Ingi Benediktsson og Ægir Jarl Jónasson (AB) voru í byrjunarliðinu hjá AB sem vann 1:0 útisigur á Ishoj í dönsku C-deildinni. Jóhannes Karl Guðjónsson stýrði liðinu til sigurs.
21. ágúst, fimmtudagur:
Elías Rafn Ólafsson (Midtjylland) stóð í rammanum á móti KuPS frá Finnlandi og átti góða frammistöðu í 4:0 sigri liðsins í fyrri leik liðanna í umspili um sæti í deildarkeppni Evrópudeildarinnar.
22. ágúst, föstudagur:
Nóel Atli Arnórsson (AaB) lék allan leikinn í 4:0-stórsigri á Hvidovre í dönsku B-deildinni.
23. ágúst, laugardagur:
Ísak Snær Þorvaldsson (Lyngby) var í byrjunarliðinu og lék í 72. mínútur gegn Horsens í markalausu jafntefli í dönsku B-deildinni.
Ólafur Dan Hjaltason (Aarhus Fremad) lék fyrri hálfleikinn í 2:2 jafntefli gegn Middelfart í dönsku B-deildinni.
Hafrún Rakel Halldórsdóttir (Brøndby) skoraði í 3:2 tapi gegn HB Köge í dönsku úrvalsdeildinni.
Sunneva Hrönn Sigurvinsdóttir (FC Kaupmannahöfn) var í byrjunarliðinu í 1:0 sigri á Esbjerg í dönsku B-deildinni.
24. ágúst, sunnudagur:
Elías Rafn Ólafsson (Midtjylland) varð fyrir óláni í 4:2 sigri liðsins á Silkeborg í dönsku úrvalsdeildinni. Hann setti boltann í eigið net í fyrri hálfleik þegar fyrirgjöf fór af honum og í markið.
Daníel Leó Grétarsson (Sønderjyske) var í byrjunarliðinu og skoraði í byrjun seinni hálfleiks þegar hann átti gott skot á markið í 2:0 sigri á Brøndby í dönsku úrvalsdeildinni. Hann var tekinn af velli á 79. mínútu og var valinn maður leiksins eftir frábæra frammistöðu. Kristall Máni Ingason lék fyrstu 70 mínúturnar fyrir Sønderjyske.
🏴 England
19. ágúst, þriðjudagur:
Benoný Breki Andrésson (Stockport) sneri aftur á völlinn eftir meiðsli í tapi liðsins gegn Bradford, 2:1, í ensku C-deildinni. Hann kom inn á sem varamaður á 73. mínútu.
23. ágúst, laugardagur:
Willum Þór Willumsson (Birmingham) var í byrjunarliðinu og lék allan leikinn í 1:0 sigri á Oxford United í ensku B-deildinni. Willum átti góðan leik og fékk 7 í einkunn hjá enska blaðinu The Football League Paper fyrir frammistöðu sína.
Stefán Teitur Þórðarson (Preston) kom inn á sem varamður á 73. mínútu í 1:0 sigri gegn Ipswich í ensku B-deildinni.
🇫🇷 Frakkland
24. ágúst, sunnudagur:
Hákon Arnar Haraldsson (Lille) lék allan tímann í 1:0 sigri á Monaco í frönsku úrvalsdeildinni.
🇬🇷 Grikkland
19. ágúst, þriðjudagur:
Hjörtur Hermannsson (Volos) lék allan tímann í 4:0-stórsigri gegn PAS Giannina í grísku bikarkeppninni.
23. ágúst, laugardagur:
Hjörtur Hermannsson (Volos) lék allan leikinn í 2:0 tapi gegn Aris í grísku úrvalsdeildinni.
🇳🇱 Holland
21. ágúst, fimmtudagur:
Kolbeinn Finnsson (Utrecht) kom inn á sem varamaður í blálokin í 2:0-útisigri á Zrinjski Mostar í fyrri viðureign liðanna í umspili um Evrópusæti.
22. ágúst, föstudagur:
Rúnar Þór Sigurgeirsson (Willem II) átti góðan leik og lék allan tímann í 1:0 sigri gegn Almere City í hollensku B-deildinni.
Helgi Fróði Ingason (Helmond Sport) kom inn á sem varamaður á 86. mínútu í 2:0 sigri gegn Emmen í hollensku B-deildinni.
23. ágúst, laugardagur:
Brynjólfur Darri Willumsson (Groningen) áfram að láta að sér kveða þegar lið hans sótti PSV heim. Hann skoraði í fyrri hálfleik í leik sem endaði með 4:2 sigri PSV. Brynjólfur skoraði með laglegu skoti úr teignum rétt fyrir leikhlé og lék allan leikinn.
24. ágúst, sunnudagur:
Kristian Hlynsson (Twente) átti góðan leik og lék allan tímann í 2:1 sigri gegn Heerenvenn í hollensku úrvalsdeildinni.
🇮🇹 Ítalía
21. ágúst, fimmtudagur:
Albert Guðmundsson (Fiorentina) átti góðan leik þegar Fiorentina hrósaði 3:0-útisigri gegn Polissya Zhytomyr í fyrri viðureign liðanna í umspili um laust sæti í Sambandsdeildinni. Albert skoraði og lagði upp í leiknum, áður en hann fór af velli á 70. mínútu.
23. ágúst, laugardagur:
Katla Tryggvadóttir lék sinn fyrsta leik frá upphafi fyrir Fiorentina. Katla var í byrjunarliðinu þegar Fiorentina vann Como, 2:0, í bikarkeppninni. Í sama riðli hafði Inter betur gegn Genoa, 2:1, þar sem Cecilía Rán Rúnarsdóttir var í markinu hjá Inter.
Kristófer Jónsson (Triestina) lék fyrstu 76 mínúturnar í 1:0 tapi gegn Alcione Milano í ítölsku C-deildinni.
Mikael Egill Ellertsson (Genoa) kom inn á sem varamaður á 72. mínútu í markalausu jafntefli gegn Lecce í ítölsku A-deildinni.
24. ágúst, sunnudagur:
Albert Guðmundsson (Fiorentina) lagði upp eina mark liðsins í 1:1 jafntefli við Cagliari í fyrstu umferð ítölsku A-deildarinnar. Hann var tekinn af velli á 72. mínútu.
Bjarki Steinn Bjarkason (Venezia) skoraði í 2:1 sigri gegn Bari í ítölsku B-deildinni. Hann lék allan leikinn.
Óttar Magnús Karlsson (Renate) skoraði í öðrum leiknum í röð í 1:0 sigri á Pergolettese í ítölsku C-deilidnni.
🇶🇦 Katar
22. ágúst, föstudagur
Aron Einar Gunnarsson (Al-Gharafa) átti laglega stoðsendingu í 2:1 sigri gegn sínu gamla félagi Al-Arabi í katörsku úrvalsdeildinni. Hann lék allan leikinn.
🇨🇳 Kína
24. ágúst, sunnudagur:
Elías Már Ómarsson (Meizhou Hakka) lék allan tímann og lagði upp mark í 2:2 jafntefli gegn Zhejiang Professional í kínversku úrvalsdeildinni.
🇭🇷 Króatía
23. ágúst, laugardagur:
Logi Hrafn Róbertsson (IK Istra) kom inn á sem varamaður á 84. mínútu í 3:0 tapi gegn Dinamo Zagreb í króatísku úrvalsdeildinni.
🇳🇴 Noregur
21. ágúst, fimmtudagur:
Eggert Aron Guðmundsson (Brann) lék í 90 mínútur undir stjórn Freys Alexanderssonar þegar Brann hafði betur gegn AEK Larnaca, 2:1, í fyrri leik liðanna í umspili um sæti í Evrópudeildinni.
22. ágúst, föstudagur:
Viðar Ari Jónsson (HamKam) lék í 82 mínútur í 2:2 jafnteli gegn KFUM í norsku úrvalsdeildinni.
23. ágúst, laugardagur:
Hinrik Harðarson (Odd) var í byrjunarliðinu og lék fyrri hálfleikinn í 2:1 tapi gegn Kongsvinger í norsku B-deildinni.
Davíð Snær Jóhannsson (Álasund) skoraði sitt fjórða mark á leiktíðinni þegar Álasund heimsótti Start í norsku B-deildinni. Hann kom inn af varamannabekknum á 75. mínútu og klóraði í bakkann með marki í blálokin.
25. ágúst, mánudagur:
Sveinn Aron Guðjohnsen (Sarpsborg) kom inn á sem varamaður á 76. mínútu í 1:0 tapi gegn Kristiansund.
🇵🇱 Pólland
21. ágúst, fimmtudagur:
Gísli Gottskálk Þórðarson (Lech Poznan) lék fyrstu 62 mínútunar þegar lið hans átti afar erfiðan leik í Evrópudeildinni og tapaði 1:5 á heimavelli gegn Genk í fyrri viðurieign liðanna um laust sæti í Evrópudeildinni.
24. ágúst, sunnudagur:
Davíð Kristján Ólafsson (Cracovia) lék allan leikinn í markalausu jafntefli gegn Piast Gliwice í pólsku úrvalsdeildinni.
🇰🇷 Suður-Kórea
20. ágúst, miðvikudagur:
Hólmbert Aron Friðjónsson (Gwangju) kom inn á sem varamaður á 63. mínútu í 2:0 sigri gegn Bucheon 1995 í fyrri viðureign liðanna í undanúrslitum í bikarkeppninni í Suður-Kóreu.
23. ágúst, laugardagur:
Hólmbert Aron Friðjónsson (Gwangju) kom inn á sem varamaður á 66. mínútu í 1:0 tapi gegn Gangwon í úrvalsdeildinni í Suður-Kóreu.
🇸🇪 Svíþjóð
19. ágúst, þriðjudagur:
Norrköping tryggði sér sæti í riðlakeppni sænska bikarsins eftir öruggan 3:0-útisigur á Viggbyholm í undankeppninni. Ísak Andri Sigurgeirsson og Jónatan Guðni Arnarsson voru báðir í byrjunarliði Norrköping en Arnór Ingvi Traustason kom inn á undir lok fyrri hálfleiks.
20. ágúst, miðvikudagur:
Júlíus Magnússon (Elfsborg) skoraði eina mark leiksins í 1:0 sigri gegn Haninge í 2. umferð sænsku bikarkeppninnar. Júlíus lék allan leikinn á miðjunni en Ari Sigurpálsson (Elfsborg) var einnig í byrjunarliðinu og lék í rúman klukkutíma.
21. ágúst, fimmtudagur:
Róbert Frosti Þorkelsson var í byrjunarliði GAIS sem lagði Odde að velli á meðan Hlynur Freyr Karlsson byrjaði í liði Brommapojkarna sem sigraði Stockholm Internazionale í sænsku bikarkeppninni.
Daníel Tristan Guðjohnsen (Malmö) var í byrjunarliði í 3:0 sigri á Sigma Olomuc í fyrri viðureign liðanna í umspili um laust sæti í Evrópudeildinni. Hann lék fyrstu 74 mínúturnar áður en hann var tekinn af velli, en Arnór Sigurðsson (Malmö) kom inn á í lokin.
24. ágúst, sunnudagur:
Mikael Neville Anderson (Djurgarden) lék allan tímann í 1:0 sigri gegn Brommapojkarna í sænsku úrvalsdeildinni.
Julíus Magnússon var á skotskónum þegar lið hans beið lægri hlut gegn Halmstads, 2:1, í sænsku úrvalsdeildinni. Markið sem Júlíus skoraði var einkar laglegt þar sem hann smellti boltanum í þverslána og í netið um miðbik seinni hálfleiks. Hann lék allan leikinn og Ari Sigurpálsson spilaði fyrri hálfleikinn fyrir Elfsborg. Gísli Eyjólfsson var í byrjunarliði Halmstads og var tekinn af velli í hálfleik.
Íslendingaliðin Malmö og Gautaborg skildu jöfn í markalausum leik í sænsku úrvalsdeilidnni. Kolbeinn Þórðarson lék allan leikinn fyrir Gautaborg og þeir Arnór Sigurðsson og Daníel Tristan Guðjohnsen komu inn á sem varamenn hjá Malmö.
María Catharína Ólafsdóttir Gros (Linköping) skoraði fyrsta markið þegar liðið vann 3:0 sigur á Vittsjö í sænsku úrvalsdeildinni.
25. ágúst, mánudagur:
Ísak Andri Sigurgeirsson (Norrköping) lagði upp sigurmarkið og lék fyrstu 87 mínúturnar í 2:1 sigri á Östers. Arnór Ingvi Traustason var einnig í byrjunarliði Norrköping og spilaði þar til hann fór af velli á 79. mínútu.
Róbert Frosti Þorkelsson (GAIS) kom inn á sem varamaður á 83. mínútu í 2:0 tapi gegn toppliði Mjallby í sænsku úrvalsdeildinni.
🇪🇸 Spánn
24. ágúst, sunnudagur:
Orri Steinn Óskarsson (Real Sociedad) jafnaði metin í 2:2 gegn Espanyol eftir að hafa komið inn á sem varamaður á 56. mínútu í spænsku úrvalsdeildinni.
🇹🇷 Tyrkland
21. ágúst, fimmtudagur:
Logi Tómasson (Samsunspor) skoraði eina markið fyrir sitt lið í 2:1 tapi gegn gríska stórliðinu Panathinaikos á útivelli í fyrri viðureign liðanna í umspili um laust sæti í Evrópudeildinni. Logi lék allan leikinn og skoraði markið með skalla í kjölfarið á hornspyrnu snemma í seinni hálfleik.
🇩🇪 Þýskaland
23. ágúst, laugardagur:
Valgeir Lunddal Friðriksson (Fortuna Dusseldorf) átti góðan leik og lagði upp mark í 2:1-útisigri á Paderborn í þýsku B-deildinni.
Lukas Petersson (Hoffenheim II) stóð í markinu í 4:1 sigri gegn Energie Cottbus í þýsku C-deildinni.
24. ágúst, sunnudagur:
Jón Dagur Þorsteinsson (Hertha) lék fyrstu 67 mínútunar í markalausu jafntefli við Darmstadt í þýsku B-deildinni.
Brynjar Ingi Bjarnason (Greuther Fürth) lék seinni hálfleikinn í 2:0 tapi gegn Holstein Kiel í þýsku B-deildinni.
Ísak Bergmann Jóhannesson (Köln) lék sinn fyrsta leik í þýsku úrvalsdeildinni þegar lið hans vann 1:0 dramatískan sigur gegn Mainz.
