Sævar Atli Magnússon gerði eina mark norska liðsins Brann þegar liðið steinlá gegn Salzburg, 4:1, á heimavelli í fyrri viðureign liðanna í 2. umferð í forkeppni Meistaradeildar Evrópu í kvöld.
Sævar Atli var í byrjunarliðinu í fyrsta sinn hjá Brann og lék fyrstu 76 mínúturnar í leiknum. Eggert Aron Guðmundsson lék allan leikinn en Freyr Alexandersson þjálfar liðið.
Sævar Atli skoraði markið á 20. mínútu og kom Brann í 1:0 og reyndist það eina markið í fyrri hálfleik. Salzburg skoraði svo fjögur mörk á síðasta hálftímanum í seinni hálfleik og ljóst að Brann á erfitt verkefni fyrir höndum þegar seinni leikur liðanna fer fram í Austurríki að viku liðinni.
