Mikael Anderson og liðsfélagar hans í Djurgården unnu stórsigur gegn Häcken á útivelli, 6:1, í sænsku úrvalsdeildinni í dag.
Mikil spenna myndaðist í seinni hálfleik, á 70. mínútu, þegar Mikael og fyrirliði Häcken, Simon Gustafson, lentu í stimpingum. Gustafson missti stjórn á skapi sínu, hrinti Mikael í jörðina og fékk beint rautt spjald og var rekinn af velli. Mikael fékk sjálfur gult spjald fyrir atvikið, en hann lék fyrstu 75 mínúturnar í leiknum.
Gustafson var ekki sáttur með Mikael eftir leikinn og sakaði hann um leikaraskap í viðtali við Expressen.
„Hann fleygir sér fjóra metra. Þetta er hluti af stærra vandamáli í fótboltanum í dag,“ sagði Gustafson.
Mikael svaraði fyrir sig í rólegheitum: „Ég var bara að reyna að ná boltanum. Hann brást svona við, líklega vegna stöðunnar í leiknum.“
Atvikið má sjá hér að neðan.
