María Catharina Ólafsdóttir Gros var enn og aftur á meðal bestu leikmanna Linköping þegar liðið gerði 2:2-jafntefli við Kristianstad í sænsku úrvalsdeildinni í kvöld.
María skoraði fyrra mark Linköping og lagði það seinna upp, en liðið er þegar fallið úr deildinni þegar ein umferð er eftir. Hún hefur á tímabilinu skorað sjö mörk og lagt upp þrjú til viðbótar.
Hjá Kristianstad átti Alexandra Jóhannsdóttir stoðsendingu í fyrra markinu og lék vel ásamt Elísu Lönu Sigurjónsdóttur, en þær fóru báðar af velli þegar um tuttugu mínútur voru eftir. Með þessu jafntefli heldur Kristianstad sjötta sætinu í deildinni.
Ingibjörg Sigurðardóttir kom síðan inn af varamannabekknum í 2:1-sigri Freiburg á Bayer Leverkusen í þýsku úrvalsdeildinni. Þetta var kærkominn sigur fyrir Freiburg sem hafði fyrir leikinn tapað þremur leikjum í röð og Ingibjörg lék lokamínúturnar í vörninni.
