Logi Tómasson átti stoðsendingu þegar Samsunspor vann Kayserispor, 3:1, í tyrknesku úrvalsdeildinni í dag. Hann sendi nákvæma fyrirgjöf frá vinstri á lokamínútu fyrri hálfleiks sem leiddi til fyrsta marks leiksins.
Logi lék allan leikinn í vinstri bakverði og hefur verið fastur maður í byrjunarliði Samsunspor frá því hann gekk í raðir liðsins frá Strømsgodset í sumar.
Samsunspor er í sjötta sæti deildarinnar með 16 stig eftir níu umferðir og hefur aðeins tapað einum leik á tímabilinu.
Mikael Egill Ellertsson lék allan leikinn fyrir Genoa sem gerði markalaust jafntefli við Parma í ítölsku A-deildinni. Genoa var mun sterkari aðilinn og fékk vítaspyrnu í uppbótartíma sem fór forgörðum. Genoa er enn án sigurs í deildinni og situr í næstneðsta sæti með þrjú stig eftir sjö umferðir.
Þá lék Nökkvi Þeyr Þórisson síðustu mínúturnar fyrir Sparta Rotterdam í 2:0 sigri liðsins gegn Groningen í hollensku úrvalsdeildinni. Brynjólfur Darri Willumsson lék ekki með Groningen vegna meiðsla. Sparta Rotterdam er í 10. sæti, á meðan Groningen er í fimmta sæti.
