Danijel Dejan Djuric lagði upp jöfnunarmark IK Istra í 1:1 jafntefli liðsins gegn Slaven í króatísku úrvalsdeildinni í kvöld.
Danijel Dejan, sem hóf leikinn á varamannabekknum, kom inn af bekknum á 61. mínútu og setti mark sitt á leikinn á lokakaflanum. Á fjórðu mínútu uppbótartímans átti hann nákvæma fyrirgjöf frá hægri sem samherji hans stangaði í netið og tryggði Istra stig.
Logi Hrafn Róbertsson var í byrjunarliði Istra og lék fyrstu 77 mínúturnar. IK Istra situr nú í 5. sæti deildarinnar með 20 stig eftir 15 umferðir.
Ísak Bergmann Jóhannesson var tekinn af velli í hálfleik þegar lið hans Köln gerði 1:1 jafntefli við Werder Bremen í þýsku úrvalsdeildinni fyrr í dag. Köln er í 9. sæti eftir 12 umferðir.
Hjörtur Hermannsson var á sínum stað í vörninni hjá Volos sem vann 1:0 sigur á OFI Crete í grísku úrvalsdeildinni. Volos er í 5. sæti eftir 12 umferðir.
Andri Fannar Baldursson lék allan leikinn á miðjunni þegar Kasımpaşa tapaði fyrir Başakşehir, 1:3, í tyrknesku úrvalsdeildinni. Kasımpaşa er í 14. sæti eftir 14 umferðir.
Þá kom Davíð Kristján Ólafsson inn af bekknum á 85. mínútu hjá Cracovia sem hrósaði 1:0 sigri gegn Korona Kielce í pólsku úrvalsdeildinni. Cracovia er í 5. sæti eftir 16 umferðir.
