Fiorentina er áfram í miklum vandræðum í ítölsku A-deildinni og hefur enn ekki unnið deildarleik á tímabilinu. Liðið gerði í dag 2:2-jafntefli við Genoa á útivelli.
Albert Guðmundsson jafnaði metin í 1:1 með marki úr vítaspyrnu á 20. mínútu eftir að heimamenn höfðu komist yfir snemma leiks. Hann sýndi yfirvegun á vítapunktinum og skoraði af öryggi gegn sínum gömlu félögum hjá Genoa, en ákvað af virðingu að halda aftur af sér í fagnaðarlátunum. Þetta var annað mark hans í deildinni á tímabilinu.
Albert fór af velli þegar um korter var eftir af leiknum en Fiorentina tókst ekki að halda forystunni eftir að hafa komist í 2:1 eftir rúmlega klukkutíma leik. Liðið hefur nú safnað aðeins fimm stigum eftir ellefu umferðir og situr á botni deildarinnar, enn án sigurs.
Mikael Egill Ellertsson lék allan leikinn fyrir Genoa sem er í 18. sæti með sjö stig.
