Hákon Arnar Haraldsson lék allan leikinn þegar Lille tryggði sér nauman 1:0-sigur á Lusitanos í frönsku bikarkeppninni í dag. Viðureignin var liður í 64-liða úrslitum keppninnar og reyndist erfiðari en búist hafði verið við gegn liði úr fjórðu efstu deild.
Staðan var markalaus lengst af þrátt fyrir að Lille stillti upp sterku byrjunarliði. Úrslitin réðust ekki fyrr en á 80. mínútu þegar Marius Broholm kom inn af bekknum og skoraði sigurmarkið, eftir sendingu frá Hákoni.
Með sigrinum er Lille komið áfram í næstu umferð bikarkeppninnar. Hákon var á meðal lykilmanna liðsins í leiknum og lagði sitt af mörkum með stoðsendingu sem skilaði úrslitum.
