Ragnar og Björn Bergmann spiluðu í tapi

Íslendingaliðið Rostov fór í dag í heimsókn til FC Orenburg í rússnesku deildinni. Ragnar Sigurðsson og Björn Bergmann Sigurðarson voru báðir í byrjunarliði Rostov í leiknum.

Rostov varð fyrir því óláni að skora sjálfsmark rétt fyrir leikhlé og eftir klukkutíma leik bætti Orenburg við öðru marki. Í uppbótartíma kom þriðja mark Orenburg og lokatölur urðu 3-0. Slæmt tap hjá Ragnari og Birni Bergmanni.

Ragnar lék allan tímann í vörn Rostov í leikum en Björn Bergmann var tekinn af velli á 67. mínútu.

Rostov berst af fullum krafti fyr­ir sæti í Evr­ópu­keppni að ári og tap í dag bætir ekki stöðuna. 4. og 5. sæti deildarinnar gefa umspilssæti í þeirri keppni og Rostov situr í 7. sæti með jafn mörg stig og andstæðingur dagsins, Orenburg, sem er með betri markatölu.