Fylgstu með okkur:

Fréttir

Jón Dagur í lækn­is­skoðun hjá AGF

Jón Dagur er kominn til Árósar í Danmörku þar sem hann gengst undir læknisskoðun hjá AGF í dag.

Jón Dagur í leik með Vendsyssel. ÍV/Getty

Jón Dagur Þorsteinsson er kominn til Árósar í Danmörku þar sem hann gengst undir læknisskoðun hjá AGF í dag. Ef allt fer að óskum skrifar Jón Dagur undir samning við félagið að læknisskoðuninni lokinni en það er 433.is sem greinir frá þessu.

Jón Dagur, sem er 20 ára, lék á nýafstaðinni leiktíð með danska félaginu Vendsyssel á lánssamningi frá enska liðinu Fulham, sem nýtti sér fyrir skemmstu ákvæði og framlengdi samning hans við félagið um eitt ár.

433.is segir að Jón Dagur muni yfirgefa Fulham og færa sig alfarið til AGF frá Árósum.

Jón Dagur stóð sig vel með Vendsyssel á nýafstaðinni leiktíð en hann skoraði fimm mörk og lagði upp önnur fjögur í 30 leikjum með liðinu.

Áður en Jón Dagur fór til Danmerkur stóð hann sig vel með bæði unglinga- og varaliði Fulham. Þar lék hann í rúm þrjú ár.

Jón Dagur á að baki 3 A-landsleiki fyrir Ísland og hefur skorað eitt mark sem var gegn Svíþjóð í vináttulandsleik í janúar. Jón Dagur bar á dögunum fyrirliðaband U21 árs lið Íslands sem vann 2-1 sigur gegn Danmörku síðasta föstudag.

Ekki missa af

Fleira tengt: Fréttir