Myndskeið
Elías Már skoraði í öðrum leiknum í röð
Elías Már skoraði eitt marka Excelsior í hollensku úrvalsdeildinni í kvöld.
ÍV/Getty
Elías Már Ómarsson og liðsfélagar hans í hollenska liðinu Excelsior unnu góðan 4-2 heimasigur á AZ Alkmaar í lokaumferðinni í efstu deild Hollands í kvöld. Elías lék allan leikinn og skoraði fjórða mark Excelsior á 66. mínútu. Þá var Albert Guðmundsson í byrjunarliði AZ Alkmaar í leiknum en hann fór af velli á 64. mínútu.
Elías var frábær með liði sínu um síðustu helgi er hann skoraði þrjú mörk og þar á meðal sigurmarkið í 4-5 útisigri á Heracles. Hann hefur gert 13 mörk í 30 leikjum á leiktíðinni.
Það var ljóst fyrir leikinn í kvöld að Excelsior myndi ekki ná að tryggja sér öruggt sæti í deildinni með sigri í kvöld en liðið fer á næstu dögum í fallumspil við lið úr B-deildinni í Hollandi.
Albert Guðmundsson og samherjar hans í AZ Alkmaar enda leiktíða í 4. sæti og fara í umspil um sæti í Evrópudeildinni að ári.
Mark Elíasar í leiknum í kvöld:
Mark Elíasar Más í kvöld. pic.twitter.com/wAUV2YublO
— Íslendingavaktin (@Islendingavakt) May 15, 2019
