Fylgstu með okkur:

Umfjöllun

Dijon lyfti sér af botn­in­um – Rúnar átti frábæran leik

Rúnar Alex átti flottan leik í marki Dijon sem vann 1-3 útisigur á Lyon í frönsku úrvalsdeildinni.

ÍV/Getty

Rúnar Alex Rúnarsson stóð á milli stanganna hjá Dijon sem vann góðan sigur gegn Lyon, 1-3, á útivelli í frönsku úrvalsdeildinni í dag.

Þetta var annar leikur Rúnars í röð en hann varði mark Dijon í 0-1 tapi um síðustu helgi.

Rúnar var í dag að fá sitt þriðja tækifæri í marki Dijon það sem af er árinu. Rúnar var í rammanum í fyrstu fimmtán deildarleikjum félagsins á leiktíðinni en missti svo stöðu sína til markvarðarins Bobby Allain.

Rúnar átti mjög góðan leik í marki Dijon í dag en hann varði nokkrar mikilvægar marktilraunir í leiknum.

Eina mark Lyon kom eftir aðeins eina mínútu og það var Martin Terrier sem náði að skora framhjá Rúnari í markinu.

Það kom þó ekki að sök, því Rúnar og félagar voru snöggir að snúa leiknum sér í vil. Dijon skoraði tvö mörk fljótlega eftir mark Lyon á stuttu millibili, á 3. mínútu og svo aftur á 7. mínútu sem var sjálfsmark.

Dijon skoraði að lokum sitt þriðja mark á 65. mínútu og það reyndist aftur vera sjálfsmark hjá Lyon.

Með sigrinum í dag situr Dijon ekki lengur á botni frönsku úrvalsdeildarinnar. Liðið situr nú í 18. sæti með 24 stig.

Ekki missa af

Fleira tengt: Umfjöllun