Fylgstu með okkur:

Fréttir

Andri Rúnar orðinn leikmaður Kaisers­lautern

Bolvíkingurinn Andri Rúnar er orðinn leikmaður þýska C-deildarliðsins Kaisers­lautern.

Mynd/[email protected]_Teu­fel

Andri Rún­ar Bjarna­son er orðinn leikmaður þýska C-deildarliðsins Kaisers­lautern en greint er frá því á heimasíðu félagsins í dag að hann hafi skrifað undir tveggja ára samning við félagið.

Andri Rúnar, sem er 28 ára, var að renna út á samningi hjá Helsingborgs í lok árs. Hann var sagður hafa vera í viðræðum um að endurnýja samning sinn hjá félaginu og þá var þýska B-deildarliðið Darmstadt orðað við hann á síðustu dögum, en Helsingborgs ákvað að selja Andra Rúnar í sumar í stað þess að missa hann á frjálsri sölu í lok árs.

Andri Rúnar átti stóran þátt í því þegar Helsingborgs tryggði sér á síðustu leiktíð sæti í sænsku úrvalsdeildinni með því að verða meistari í sænsku B-deildinni. Andri gerði samning við félagið fyrir síðustu leiktíð eftir að hafa átt frábært tímabil með Grindavík sumarið 2017, þar sem hann skoraði alls 19 mörk í 22 leikjum.

Frumraun Andra Rúnars í atvinnumennsku gekk eins og í sögu og hann tók sænsku B-deildina, Superettan, með trompi á síðustu leiktíð og hirti markakóngstitilinn. Hann skoraði 16 mörk og lagði upp önnur sex. Andri Rúnar hafði skorað þrjú mörk í átta leikjum á núverandi leiktíð.

Kaisers­lautern endaði í 9. sæti þýsku C-deild­ar­inn­ar á nýafstaðinni leiktíð en liðið féll úr þýsku B-deildinni á þarsíðustu leiktíð. Liðið féll úr þýsku úrvalsdeildinni árið 2012 og hefur ekki átt góðu gengi að fagna síðustu ár. Jón Daði Böðvars­son lék með liðinu fyr­ir þrem­ur árum síðan.

Ekki missa af

Fleira tengt: Fréttir